Diwrnod 1: Teithio i Dover i ddal y fferi i Ffrainc. Yna ymlaen i ddinas Reims am swper, gwely a brecwast yng ngwesty Novotel Reims Tinqueux (4 seren).
Diwrnod 2: Fore heddiw, cewch gyfle i grwydro a chael blas ar ddinas Reims a’i heglwys gadeiriol wych, cyn mwynhau taith o gwmpas un o’r “tai Champagne” enwog sy’n nodweddu’r ardal. Yno, cewch glywed hanes creu’r gwin pefriog arbennig a’r prosesau sydd ynghlwm â hynny, ac ar ddiwedd y daith, bydd cyfle i flasu’r hylif hyfryd! Yn y prynhawn, gadael Reims a theithio heibio Nancy i ardal Alsace lle byddwn yn aros am bedair noson (swper, gwely a brecwast) yn yr Hotel L’Europe Colmar Horburg-Wihr (4 seren).
Diwrnod 3: Ar ôl brecwast, dim ond taith fer o’r gwesty a byddwn yn nhref ddeniadol Colmar a elwir yn “Fenis Fach” oherwydd y camlesi niferus sydd yno. Mae’r Hen Dref hanesyddol yn cynnwys llu o dai pren lliwgar, caffis a thrysorau pensaernïol o gyfnod y Dadeni. Yn eu mysg mae’r farchnad dan do, Amgueddfa Unterlinden, a replica o “Gerflun Liberty”, gan mai dyma dref enedigol y cerflunydd Auguste Bartholdi. Cewch ddiwrnod rhydd yma i ddarganfod atyniadau’r dref fywiog hon sy’n wledd i’r llygad.
Diwrnod 4: Heddiw, teithiwn tua’r gogledd i ymweld â Strasbourg, un o ddinasoedd mwyaf deniadol Ewrop. Saif ger y ffin â’r Almaen, ac mae’r canol hanesyddol yn Safle Treftadaeth Byd UNESCO. Mae digon o fannau difyr i’w gweld, fel yr Eglwys Gadeiriol Gothig a llu o amgueddfeydd, yn ogystal â chaffis a bariau dirifedi. Rydym wedi cynnwys taith cwch ar un o gamlesi’r ddinas, sy’n ffordd wych o weld y golygfeydd i bob cyfeiriad. (Mae’n bosib y bydd taith ddirgel ychwanegol yn gynwysedig ar y diwrnod hwn hefyd – mwy o wybodaeth yn nes at y dyddiad!)
Diwrnod 5: Heddiw, byddwn yn cael cwmni tywysydd lleol i deithio ar hyd Llwybr Gwin enwog Alsace. Gyda bryniau’r ardal yn frith o winllannoedd a’r afon Rhein yn llifo drwyddi, mae llawer o drefi a phentrefi hardd i ymweld â nhw, nifer yn cael eu hystyried ymhlith y prydferthaf yn Ffrainc. Byddwn yn galw yn Riquewihr a elwir yn “Berl y Gwinllannoedd”, a Ribeauville gyda’i adeiladwaith canoloesol. Byddwn hefyd yn galw mewn gwinllan leol am daith o’i chwmpas a chyfle i flasu’r cynnyrch!
Diwrnod 6: Gadael Alsace a theithio i gyfeiriad Paris a dinas frenhinol Versailles. Teithiwn drwy gefn gwlad hyfryd Burgundy, gyda’i winllannoedd a’i drefi hardd. Cawn amser rhydd dros ginio yma cyn mynd ymlaen i westy Novotel Chateau de Versailles (4 seren) am swper, gwely a brecwast.
Diwrnod 7: Teithio i’r porthladd i ddal y fferi i Dover ac adref.